Bertizko Natur Parkeak ate irekien eguna ospatuko du larunbat honetan, lorategi historikorako doako sarrera, bisita gidatuak, tokiko produktuen azoka, musika eta dokumental baten proiekzioa barne.
Egunean zehar, lorategi historiko-artistikorako sarrera doakoa izanen da parkearen irekiera-ordutegian, 10:30etik 14:00etara eta 16:00etatik 19:30era. COVID19ak eragindako osasun-neurriak direla eta, jarduera guztiek edukiera mugatua izanen dute; beraz, aldez aurretik izena ematea gomendatzen da, 948 59 24 21 telefonoan edo cinberti@navarra.net helbide elektronikoan.
Lorategi historiko-artistikora 10:30ean, 11:30ean eta 16:30ean eginen dira bisita gidatuak. Adin txikikoentzako sarrera doakoa da, helduentzako, berriz, 3 eurokoa eta harrera- eta informazio-etxolan eskura daitezke.
Gainera, Jauregiko Dorotea aretoan Anderea dokumental errealista eta onirikoa proiektatuko da, euskal mitologiako numen (pertsonaia edo jainkosa) nagusian oinarrituta. Bi emanaldi eginen dituzte: bata euskaraz 12:30ean eta bertzea gaztelaniaz 17:00etan.
Musikak ere bere lekua izanen du ospakizun honetan, Amaiurko Gaztelu taldeak 18:00etan kaperan eskainiko duen kontzertuarekin.
Eskaintza osatzeko, Argitsu artisauen elkarteak tokiko produktuen azoka jarriko du parkeko zelaian, 10:30etik 14:00etara.