Albiasu eta Aizpuruk irabazi dute Narbarteko frontenis txapelketa

Ttipi-Ttapa 2021ko abu. 25a, 12:00

David Albiasu eta Alazne Aizpuru izan ziren irabazle, Julen eta Izaskun Iriarte txapeldunorde. Ttikien artean, berriz, Oinatz eta Aieko nagusitu ziren. Koskorrek ez zuten finala jokatzerik izan.

Joan den asteburuan, abuztuaren 22an, jokatu ziren Narbarteko frontenis txapelketako finalerdiak eta finalak. Goizean Maite eta Youssef Alazne eta Daviden aurka aritu ziren eta azken hauek lortu zuten finalerako txartela. Aitzinetik haurrak herri kiroletan aritu ziren.

Arratsaldean, finalen ordua izan zen. Lehenbizi ttikienak aritu ziren. Oinatz eta Aiekok 22-17 irabazi zieten Pablo eta Urkori. Ondotik, koskorragoek finalerdia jokatu zuten. Ugaitz eta Iradi Martin eta Oihanen aurka aritu ziren.

Azkenik, handien finala izan zen. Julen Iriarte eta Unai Pikabea David Albiasu eta Alazne Aizpururen kontra aritzekoak ziren baina Unaik ezin izan zuenez, Izaskun Iriartek ordezkatu zuen. Dabid Albiasu eta Alazne Aizpuru izan ziren garaile, 30-18 mendean hartuta.

Finalerdi eta finalen bueltan, giro polita izan zen herrian eta jendea animatzera hurbildu zen.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun