Oieregiko Juanto Apezetxeak jasoko du 2017ko Nafarroako entrenatzaile onenaren saria

Ttipi-Ttapa 2018ko urt. 25a, 09:42
Juanto Apezetxea, Anaitasuna eskubaloi taldeko entrenatzailea.

Anaitasuna eskubaloi taldearekin bosgarren postua lortu du Asobal ligan, kopako finalerdiak jokatu zituen eta EHF Cup konpetiziorako sailkatu du 

Nafarroako Gobernuaren Kirol eta Gaztediaren Institutuak urtero banatzen ditu gehien nabarmentzen diren kirolari, kirol talde, teknikari, erakunde eta federazioendako sariak. 2017 urteari dagokionez, Maitane Melero atleta eta Ivan Salguero igerilaria izendatu dituzte kirolari onenak. Entrenatzaile onena, berriz, Oieregiko Juanto Apezetxea Aizpuru, Anaitasuna eskubaloi taldeko entrenatzailea izendatu dute. Otsailaren 26an jasoko dituzte sariak Iruñeko Baluarten.

 

Juanto Apezetxeak 2015eko azaroan hartu zuen taldea eta Asobal ligako goitiko postuetara eraman du. Honela, Asobal ligan bosgarren postua eskuratu izana, kopako finalerdietara ailegatzea eta EHF Cup konpetiziorako sailkatzea azpimarratu dute saria ematerakoan.

 

Bertze sariak

Emakumezkoen kirol talderik onena La Unira errugbi talea izan da eta gizonezkoen talderik onena, areto-futboleko CA Osasuna-Magna izan da. Kirol zerbitzurik onena Zizur Nagusiko Kirol Zerbitzua izan da eta federaziorik onena Nafarroako Mendi eta Eskalada Federazioa. Klubarik onena Zangozako CD Cantolagua izendatu dute, enpresa babesle onena Helvetia Seguros eta kirol proiektu berritzaile onena, Nafarroako Ur-azpiko Jarduera Federazioak egin duen urpekaritza egokitu proiektua.

Bertze aldetik, parte-hartzea sustatzeko, kirol balioen saria jendeak bozka dezake otsailaren 7ra bitarte Kirol eta Gaztediaren Institutuaren webgunean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun