Natur parke batean egiten den lehen lan-kanpalekua egiten ari dira Mundu osoko gazteak Bertizen

Ttipi-Ttapa 2017ko abu. 10a, 12:16
Herrialde ezberdinetako gazteak ari dira lanean Bertizen.

Urte honetan berreskuratu ditu Nafarroako Gobernuak ingurumenarekin lotutako kanpalekuak, gazteen mugikortasuna eta kultur arteko topaketa buktzatuz 

Herrialde ezberdinetako 25 gazte parte hartzen ari dira egunotan Bertizko Natur Parkeko lan-kanpalekuan. Nafarroako Gobernuko Kirol eta Gaztediaren Institutuak antolatu du, Ingurumen eta Lurralde Antolaketa Zuzendaritza Nagusiaren laguntzarekin. Azpiegitura ezberdinen, bidaxken eta lorategien mantenuan eta zaharberritzean ari dira lanean.

 

18 eta 30 urte arteko gazteak ari dira programa honetan, Espainiako komunitate ezberdinetakoak (Extremadura, Kanariar Uharteak, Madril, Andaluzia eta Valentziar Komunitatea), baita bertze herrialdetakoak ere (Serbia, Errusia eta Taiwan). Uztailaren 31n hasi ziren eta abuztuaren 13ra bitarte ariko dira lanean. Baina lanaz gain, Bertizko Natur Parkeko basoa bisitatzeko aukera ere izaten dute arratsaldetan eta asteburuetan, Bidasoaldeko gastronomia, kultura eta ohiturak ezagutzeko bertze jarduera osagarrien artean.

Natur Parkeko mantenimenduko langileek gidatzen dituzte lanak, Kirol eta Gaztediaren Institutuak kontratatutako hiru monitorerekin batera. Gazteek Natur Parkaren barrenean dagoen Zabala etxean hartzen dute ostatu.

Erlazionatuak

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun