Bertze behin ere ailegatu eta joan egin dira bestak, bidean bestondoak eta oroitzapenak utziz. Ez ziren modurik onenean hasi bestak, bezperan egin zuen euria ez zen aproposena bestarako, baina jakina, gogoak eguraldiari irabazi egin zion. Bezperan eguraldi kaxkarra egin zuen, baina beste egunetan eguzkia dotore ikusi zen. Hala, bezperan etxez-etxe ibili ziren gazteak eta segidan zopak izan ziren ostatuan eta hainbat etxetan.
Biharamunean, zaindariaren egunean, meza ondotik, luntxa eta buruhaundiak izan ziren, plazan haurrendako puzgarriak eta jokoak eta eguerdian gazte bazkaria. Ilunabarrean, berriz, ohikoa bihurtu den tortilla lehiaketa. Igandean haurrendako bonba japoniarrak eta buruhaundiak izan ziren eta arratsaldean herri kirolak.
Astelehenean zikiroa izan zen nagusi eta plazan 80 bat lagun bildu ginen. Egunero musikak ere izan zuen tartea bai egunez eta bai gauez ere.