Uztailaren 4an izandako uholdeak utzitako ondorioak herrian ere ederki nabaritu dira. Jakina den bezala ez zen bertan izandako euriarengatik izan baizik eta Baztanen bota zuenarengatik.
Kalteak nabarmenak izan dira, Bentuneko eta Petixeneko etxekoei zurginan belagian pilaturik zituzten 70 bat silo bola urak eraman eta hondatu egin zizkien; Albinekoei Giltxaurdegin zituzten 30 urteko hiru giltxaur zain irauli zien, Argiñenekoei Errota ondoan duten belagian egur pila hedatu zien eta paretetan kalte ederrak izan zituzten; Errota ondoko kiwi plantazioak ere kalteak izan zituen, Errotan bertan ura sartu zen, Marinon etxekoak goiz hartan beteta zuten gasoil tankea eraman zien eta Lakoizketakoei Lanbaseko belagiko hesia hondatu eta bertan zituzten 20 silo bola eraman.