1987ko otsailaren 12an Narbarten sortua da Asier Arretxea. Duela hamar urte hasi zen errugbian jokatzen Baztan Rugby Taldearekin. Aurten, Ohorezko mailan Ordiziarekin jokatzeko aukera izan du eta sekulako denboraldia burutu du ohorezko mailan. Hirugarren lerroan jokatzen du, aurrelari, eta hasieran taldean sartzea kosta bazitzaion ere, azkenean titular postua lortu eta partida guziak jokatu ditu, titulurako play-offekoak barne. Titulurik ez irabaztea izan da, hain zuzen, gelditu zaion arantza bakarra.
BRTtik Ordiziarako urratsa nahiko zaila egin zitzaiola onartu digu Arretxeak: «Orain urtebete jaso nuen deia, eta onartzea erabaki nuen, nahiz eta duda askorekin, aukera polita zela banekien baina baita jokatzea hagitz zaila zela ere. Ordiziak atzerritarrez indartzen baitu bere taldea». Hortaz, salto handia somatu du bai mailari dagokionez, baita eskakizunei dagokionez ere: «Hasieran astean lau entrenamentu nituen, gehi aparte gimnasioko sesioak, niretzat behar beharrezkoak direnak, ni nahiko gorpuzkera txikikoa bainaiz. Eta mailari dagokionez, oso gogorra egin zitzaidan aurkariak handiagoak zirelako eta plakaje eta kontaktuak puxkaz gogorrak zirelako. Lehenengo partida aurretik beldurra eta dena pasa nuen jokatu ala ez pentsatuz, baina jokatzera atera orduko, dena ahaztu zitzaidan» gogoratzen du irriz.
Tituluen borrokan murgildua egoten den Ampo-Ordizia taldean lehenengo urtean lekua egitea eta minutuak jokatzea zaila izan da Narbartekoarentzat, baina lortu du azkenean: «Hasieratik minutuak jokatu ditut, nahiz eta partida bat edo bertze bankillotik ikusi, eta denboraldi erdian taldea pixkat jautsi eta aldaketa batzuk egin zituen entrenatzaileak eta orduan eman zidaten aukera titular moduan jokatzeko. Eta aukera aprobetxatu nuenez, hortik aurrera denak titular jokatu ditut, play off-ekoa barne. Baina hori mantentzeko lan asko egin behar izan dut, bai zelaian eta bai gimnasioan».
Halere, arantzatxoa ere sartua dute taldean, aurten ez baitute titulurik lortu. «Ba bai, dezepzio handia izan da –onartu digu Arretxeak–. Kopan batez ere azkeneko bi urteotan kopa irabazi baitzuen Ordiziak, eta gainera kontuan hartuz atzerritar dexente dauzkagula helburu horiek betetzeko».
FUTBOLA VS. ERRUGBIA
«Ezin dira konparatu futbola eta errugbia, eta mugitzen duten dirutza aldetik eta gutxiago. Hemen ia ez da errugbirik
ikusten eta pena da, Iparraldean nola bizitzen den ikusita»
ZALEEN BABESA
«Kopako finalerdian zortzi autobus joan ziren Goierritik Valladolidera guri animatzera. Hori eskertzekoa da eta
neretzat esplikaezina. Horrenbertze jende zure izena oihukatzen aditzea izugarria da»
EUSKAL SELEKZIOAN
Ordiziarekin egin duen denboraldiak, halere, ezusteko saria ere ekarri dio Arretxeari, euskal selekzioaren deia jaso baitu. «Ez nuen halakorik espero eta ilusio handia egin zidan, nahiz eta ezin izan dudan jokatu lesio baten ondorioz. Ordiziako fisioek ez zidaten jokatzen utzi». Eta etorkizunera begira, heldu den denboraldian ere Ordizian segitzeko eskaintza jaso du eta oraindik erabaki gabe baldin badu ere, bertze urtebetez segituko duela pentsatzen du. Profesional moduan aritzea ere gustatuko litzaioke, bertze lan batekin bateratzea zail ikusten baitut: «Orain langabezian nago eta hori aprobetxatu dut».
Errugbian gehien gustatzen zaiona zer den galdetuta, «plakatzea, toucha (alboko sakea) eta hirugarren denbora, hau da, partida bukatu eta gero egiten den bi taldeen arteko merendua» aipatu dizkigu. Hori bai, ezin omen dira konparatu Baztango hirugarren denborak eta Ordiziakoak, «Baztangoak hobeak» dio. Goierrin afizioak Ordizia errugbi taldeari ematen dion babesa ere azpimarragarria iruditzen zaio. «Adibidez, kopako semifinaletan 8 autobus joan ziren Valladolidera partidara guri animatzera. Hori eskertzekoa da eta niretzat esplikaezina. Horrenbertze jende zure izena oihukatzen aditzea izugarria da».
Nahiz eta askorentzat kirol ezezaguna izan edozeinek praktika dezakeela ere jakinarazi du Arretxeak, «azkarrak nahiz pisutsuak izan, edozeinek joka dezake postu desberdinak baitaude eta jendeak probatzeko nahikoa du ortziral arratseko 8etan Lekarozko zelaitik pasa, ikusi eta probatu».