Kolore gorria eta itxura ederra, hori da gure baratzeetako erreginaren aurpegia. Udako otorduetan eta herriko baratzeetan ederki dauka bere lekua hartua tomateak.
Gure herrian ere ohitura haundiko barazkia da eta erraza da edozein baratzetan begitu eta bere itzala ikustea. Denbora medio, hasia da zonaldeko bazterretan gure herriko tomatea ezagutzen, urte aunitz baitira jendea plantak erostera etortzen dela.
Gaur egun, etxe pare bat gelditzen dira herriko tomate planta lantzen segitzen dutenak eta horietako bat Jabier Juanaberria Xuanko da. Berekin solastu gara.
• Noiztik zabiltza tomate kontuetan?
Etxean betidanik ohitura izan da. Nire aitonak landatzen zuen, gero nire aitak eta orain nik.
• Zein da tomateak ekoizteko prozesua?
Lehenik hazi hoberenak altxatzen dira, gero martxo aldera ilargia berapenean dagoenean erein. Maiatzaren 10 aldera plantak saltzen hasten gara eta etxeko baratzean birlandatzen ditugu eta gustu haundiarekin zaintzen saiatzen gara.
• Ofizioa ala afizioa da zuretako?
Duela hogeita hamar urte ofizioa zen, baina gaur egun afizioa da niretzat.
• Zenbat landare saltzera iritsi zarete?
Duela hogeita hamar urte 9.000 landare saltzen genituen eta gaur egun 3.000 inguru.
• Konpetentzia nabaritzen al da?
Bai, gaur egun nonahi eros daitezke.
• Noiz arte segituko duzu?
Bertze mundura joan arte segitu nahiko nuke.
• Zer du Narbarteko tomateak bertzeek ez daukatena?
Dena ona daukala, eta gustu paregabea duela.
• Akitzeko, tomatea jateko erarik hoberena zein da zure ustez?
Ozpina, olioa, gatza, tipula eta piper pixka batekin.