Aurrez prestatutako janarien eta zerbitzuen eraikina, biltegiak, gasolindegia, aparkalekuak eta ekipamenduen eremua egin nahi ditu Martiko enpresak Narbarten. Eta horretarako udal hirigintza planean egin beharreko aldaketek aldeko Ingurumen ondorioen adierazpena hartu dute, Nafarroako Gobernuko Ingurumenaren eta Uraren zuzendari nagusiak emana.
Egitasmoa N-121A errepidearekin muga eginez eraiki nahi du Martikok, bi eremutan antolatuta. Industria eremua 106. lurzatian eginen litzateke, errepidearen hegoaldean, eta 34.728 m2ko azalerarekin. Hemen janarien eta zerbitzuen eraikina, biltegia, gasolindegia eta aparkalekuak eginen lirateke eta bidearen iparraldean, berriz, ekipamenduen eremua eta sistema orokorrak. Berdegune bat ere proposatu da proiektuan, 18 metroko zabalerakoa errepidearen parean eta 25 metroko zabalerakoa Bidasoa ibaiaren parean eta eraikinetatik bereizteko zuhaitz hesi bat landatzea ere bai.
Aldeko ingurumen txostena badu proiektuak, baina horrekin batera, neurri batzuk hartu beharko dira: ibaiaren berdegunearen eta eraikinen artean, oinezkoendako ibilbide bat diseinatuko da, baita integrazio neurriak ere, hala nola, landaresiak eta bertze hesi batzuk ere, ibilgailuek edo materialek ondoko berdegunea okupa ez dezaten. Nekazaritza pasabideak sarrera murriztua izan beharko du.
Euri urei dagokienez, Bidasoa ibaiaren baldintzetan ahalik eta aldaketa ttikiena izateko soluzioren bat ere beharko da eta lur mugimendu guttien egiten eta lurren ahalik eta konpentsazio handiena lortzen saiatu beharko da. Gisa berean, Bidasoa ibaiaren naturgunea eta Bertizko Natur Parkea hurbil daudenez, behar diren neurriak hartuko dira argi kutsadura saihesteko.
Aitzineko agintaldian hasitako egitasmoa
Martikok duela urte batzuk aurkeztu zuen proiektua. Udal plan orokorren aldaketek lurzoru urbanizaezina ukitzen dutenean, udal plan orokorretako aldaketek Ingurumen ebaluazio estrategikoa eta Ingurumen ondorioen adierazpena behar dituzte.
Aitzineko Udalak, 2006ko urtarrilean onetsi zuen udal planaren aldaketa eta Nafarroako Aldizkari Ofizialean egon zen epean, 14 alegazio aurkeztu ziren, partikularrenak eta Oieregiko Kontzejuarenak.
Ingurumenaren Integrazioko Zerbitzuak aldaketak Ingurumen Ebaluazio Estragikoa behar zuela ebatzi zuen 2006ko ekainean eta hala, Ingurumen ondorioen azterlana egiteko eskatu zuen. 2008ko otsailean jaso zen aipatu azterlana. Kokagunea interes naturaleko ibai-ibar batean hautatzea justifikatu behar zela erran zen berriz, eta paisaiaren gaineko ukipenak baloratu behar zirela.
2010eko urrian, dokumentazio osagarri gisa Errekerimenduei erantzuteko eranskina eta Baztan ibaiak Narbarten duen uholde arriskuaren gaineko azterlana jaso ziren. Udalak 2011ko martxoan argitaratu zituen iragarkiak Nafarroako Aldizkari Ofizialean, Ingurumen ondorioen azterlanarekin. Alegazio gehiago aurkeztu ziren, partikularrenak eta Oieregiko Kontzejuarenak.
Alegazio horietan ageri denez, uste dute «industria eremu berri baten proposamenak berarekin dakarrela lurralde okupazioaren ereduan aldaketa garrantzisu bat egitea eta hori ez datorrela bat planeamenduan defendatutako ereduarekin». Diotenez, paisaiaren gaineko ukipenek «kalte larria» eginen dute ibarrean, eta «bereziki, eremu zehatz horretan, Bertizko Natur Parkeko sarreretako bat baita, eta baliabide garrantzitsua ingurumenaren eta sozioekonomiaren aldetik». Etxeen industria eremuarekiko hurbiltasunaren ondorioz, «herritarrek bizi kalitatea galduko dutela aurreikusten dute». Horrez gain, alegazioetan azaldu denez, «Ingurumen ondorioen azterlanak ez ditu behar beste baloratu okupazio industrialaren eta lurraldearen erabilera aldaketaren ondorioz izan daitezken paisaiaren ukipenak». Ur horniduraren aferarekin kezkatuta daudela ere alegatu dute, baita 2006ko hasierako onespenetik gaur arte «aldaketa aunitz» izan direla ere, etxe berriak egin direlako eta «eskualdean ekimen soziekonomikoak garatu direlako».
Alegazioak aurkeztu dituztenak eskualdeko garapen industrialaren alde ageri dira, baina industria eremua Legasako industrialdean kokatzearen aldekoak dira».