Hiruzpalau bat aste pasatu dira Bittorik ostatua utzi zuenetik eta bazen gogoa berriz ere elkartzeko txoko bat izateko. Garaiak garai, Bittoriren momentua pasatu zen eta orain Barbararen zikloa hasi da. Kontzejuak Herriko Ostatua hartzeko epea zabaldu zuenetik bizpahiru interesatu agertu ziren, baina azkenean, Barbara gelditu da ostatua hartzeko ardurarekin. Hala, apirilaren 13an zabaldu zituen lehenbizikoz Barbarak ostatuko ateak.
Bere garaiari, ilusioz beteta eta lanerako gogo izugarriekin ekin diola erran digu. Bere asmoen artean, plater konbinatuak, bokadiloak, pintxoak eta razioak zerbitzatzea dago. Jakinarazi digu jende guztiari zabaldu nahi dizkiola ostatuko ateak eta ea denen artean herriko txoko polit eta girotsu bat osatzea lortzen dugun. Zorterik hoberena opa diogu.