Azkeneko hauteskundeetatik hilabete batzuk pasatu dira dagoeneko. Kontzejuan jendea sartzeko hainbat saikeraren ondotik, azkenean taldea osatu eta Iruñetik onarpena jaso ondotik, honakoek osatzen dute Kontzejua: Laura Andresena, Asier Irisarri, Aitor Zelaieta eta Dabid Andresena. Erran, denek ere esperientzia badutela Kontzejuaren egunerokoetan, izan ere, aurreko legealdian aritutakoak dira. Kontzejuko lehendakaria edo alkatesa Laura Andresena izanen da.
Bilera irekia
Apirilaren 28an Kontzejuak bilera irekia egitekoa zuen, aterpea subastan ateratzeko hainbat baldintzen inguruan solasteko. Herritarren iritzi edo proposamenak biltzeko asmoa zuen eta proposamenak jaso ondotik, baldintzen agiria delakoa prestatu eta Nafarroako Gobernura bidaliko dute Kontzejuko ordezkariek.
Bertzalde, aterpeari izen bat jartzeko proposamenak ere eskatu ziren eta apirilaren 28aren aurretik kontzejuko buzoian utzi behar ziren. Egun horretako bileran, jaso ziren izen ezberdinak aurkeztu eta horien artean, bozketa egitekoa zuten. Boto gehien bildutako proposamenak 30 euro lortu zituen.
Xehetasun gehiago hurrengo alean emanen dugu.
Auzolanak
Auzolanak egiteko deialdia ere zabaldu du Kontzejuak. Lehenengoa apirilaren 28an egitekoa zen. Aurten, hiru auzolan egin beharko dira eta auzolanak aterpetxeko lanak egiteko erabiliko dira.