Bidasoa planaren barne, Arcelor Mittalek Legasan duen lantegia itxiko zela adierazi eta bertan egiten zen produkzioaren zati bat Lesakako lantegira eraman ondotik, orain Legasako lantegia ez dela itxiko jakinarazi du enpresak, prentsan azaldu denez.
Legasako lantegiak bi lan-lerro izanen ditu: estatu osoan 25 biltegi dituen banaketa arlorako mozketa lanak eta laminatua hotzean. Ehun bat langile ariko dira eginkizun horietan, baina denak berriz ere Lesakatik bueltan etorriko omen dira. Zabaldu denez, baliteke gaur egun Asturiasko Avilesko lantegian egiten diren bernizatze lanak ere Legasan egitea, instalazioak aprobetxatuz.
Duela urtebetetik honat, Lesakako lantegiak lerro konbinatu berria du, altzairuzko txapa margotzeko prozesua duena. Lerro hori 2009ko abenduan hasi zen jartzen, 25 milioiko inbertsioa eginda.
Bere garaian, Legasako lantegia itxiko zela erran zenean, instalazioak eta lur eremuak industriagune berri bat egiteko aprobetxatzea pentsatu zen eta Nafarroako Gobernuak ere interesa agertu zuen. Alde horretatik, Arcelor Mittal enpresak, industriarako erabiliko ez diren eremuengatik izan ditzakeen eskaintzetara zabalik dagoela adierazi omen du.