Afaltzeko ardua da, jendea mozorrotorik ostatuan agertzen hasi da, ilusioa nabaria da, edozein lekutara begiratu eta besta egiteko gogoa ikusten da. Horixe izan zen inauteriak hasi baino lehen gertatu zena. Eta orain, pasatu direla, gustura joan zaizkigula erraten ahal dugu, umore onez eta giro ederrean.
Ederki pasatu zen ortziral gaua, goizeko ordu ttikietara ailegatu zen besta eta batzuendako gosarira arte.
Gosaldu ondotik, berriz mozorrotu eta hain gustura hartzen den etxez-etxeko bisita egitera joan ziren gazteak.
Gauean, berriz, afaria izan zen eta aguantatuz gero, gaupasan segi. Horrelaxe joan zaizkigu aurtengo inauteriak, hasierako ilusioa bestondo ederrean bihurtuta.
Ortzegun Gizena
Herriko haurtxoek ere ederki pasatu zuten inauterietako bere egunean, Ortzegun Gizen egunean. Gurasoak medio zirela, mozorrotuta herriko etxeak bisitatu zituzten. Eguerdian ederki bazkaldu zuten ostatuan eta jarraian, jokoz betetako arratsalde polita pasatu zuten. Seietan jende guziarendako berendu bapoa eskaini zen.