Aurtengo aurrematrikulazio kanpaina otsailaren 6tik 13ra bitarte izan da eta berri ona dugu, lau haur gehiago izanen baitira eskolan hurrengo ikasturtean.
Erran daiteke, eskolak lasaitu izpi bat hartu duela. Lau ikaslerekin egon zen 2009-2010 ikasturtean, baina haurrak jaiotzen ari zirela ikusirik, ez ixtea erabaki zuen Nafarroako Gobernuko Hezkuntza Departamentuak.
Legasako eskola ez da oraingoa. 1984-1985 ikasturtean ireki zen lehen aldiz, urte aunitzez itxita egon ondotik. Gaur egun, Kukun aurkitzen den eskola berritzen ari zirela eta, Kapaineko eskola zaharrean 15 neska-mutil hasi ziren errandako urtean.
Bertan, maixu gazte-gaztea zen Karlosek hasiera eman zion hainbertze urteetan bere lantoki izan den eskola honi.
Ikasturte bat beranduago, hau da, 1985-1986an eskola berria estreinatu zuten 23 ikaslek. Erran, eskolaren historian ikasturte horretan izan zela ikasle kopuru haundiena.
Ikasle guttien izan zuen ikasturtea, ordea, lehen aipatu bezala, 2009-2010 izan zen, lau ikaslerekin.
Aurtengoan, berriz, zortzi ikasle dira dagoeneko eta hurrengo urteari begira ere goruntz doa ikasle kopurua. Heldu diren urteetarako aurreikuspena ere hagitz ona da. Urtero jaiotzak izaten ari dira eta horrek lasaitasuna ematen dio gure eskola ttikiari.