ARCELLORREN LURRA
«Oraindik ArcelorMitall dagoen lurra multinazional baten lur pribatua da eta ez daki zer eginen duen. Seguruenik etorkizunean Gobernuak eskuratuko du, baina bitartean gure garapena egin nahi dugu»
Andres ETXENIKE
Bertizaranako alkatea
ARCELLORREN LURRA
«Iritzi publikoak ongi dakienez, gezurra da ArcelorMittalek lurrak ez dituenik saldu nahi. Bidasoa Plana gauzatzen ari da eta ondorioz, lur industrial hori interesatu guzien esku egonen da»
Bizilagun taldea
Udalak 105.000 metro koadro lur industriala sortuko du. Andres Etxenike alkatearen erranetan, lur eremu industrial hori bi proiektu pribatuk hartuko dute eta hirugarren egitasmo bat Udalarena da.
Lehenbiziko proiektua lehengo N-121A errepide ondoan joanen litzateke, 35.000 metro koadro hartuz, eta aurrez sukaldatutako platerak, saltokia eta gasolindegia eginen lirateke. 40 bat lanpostu sortuko lituzke.
Errepidearen bertze aldean egonen litzateke Udalaren egitasmoa, 20.000 metro koadro hartuz eta horietatik 6.000, errepidetik hurbilen daudenak, bi nabe jartzeko. Herrigunean dauden tailerrak industrigune horretara eramatea da Udalaren asmoa eta bi proiektuetara sarbidea izateko biribilgunea eginen litzateke. Hala, kirol hornidurarako bideratua zegoen lur eremua industriarako birkalifikatu du Udalak Hirigintza Planean.
Apirilaren 1ean akitu zen lehenbiziko proiektu horri alegazioak aurkezteko epea eta bizilagun talde batek aitzinetik jakinarazia zuen aurkeztuko zituela. Bizilagunen hitzetan, «beti agertu gara birkalifikazio honen kontra, izan ere, 500 metro eskasera baitago Legasako industrialdea, industriarako okupatzeko 200.000 metro koadro lur eremua duena».
Ildo honetan, ingurumenaren defentsan eta Baztan-Bidasoaldean industria eta enplegua bultzatzeko, birkalifikazio honen kontrako alegazioak aurkeztu ditu Nafarroako Alderdi Sozialistak ere eta kaltetutako bizilagunek babesa ematen diote PSNk alegazioetan adierazitakoari.
Bizilagunen arabera, «inoiz ez gara egon eta ez gara egonen lanpostuak sortzen dituzten eta Bertizaranari balioa ematen dioten proiektuen kontra, baina ez promotoreari gogoratzen zaion lekuan, egon behar duten lekuan baizik, hau da, Legasako industrialdean». Alkateak, bere aldetik, adierazi du «oraindik lur hori multinazional baten lur pribatua dela eta ez dakiela horrekin zer eginen duen. Seguruenik etorkizunean Nafarroako Gobernuak eskuratuko du, baina bien bitartean gure garapena egin nahi dugu».
Bizilagunek gogoan dute, bai alde batera eta bai bertzera ere, hamar metro edo guttiagora etxebizitzak daudela eta 2004an eta 2006an aurkeztutako aurretik sukaldatutako plateren proiektu industrialak bertan behera gelditu zirela.
Herriko Etxeak birkalifikazio honetarako eta Legasako industrialde handiaren garapena uzteko erabiltzen duen argudioa zera da, ArcelorMittalek behin eta berriz ezezkoa eman diola industriarako lurren salmentari eta hortaz, industrialde berria egitearen beharra. Bertzelakoa dio, ordea, bizilagun taldeak: «iritzi publikoak ongi dakienez, gezurra da ArcelorMittalek lurrak ez dituenik saldu nahi. Gaur egun Bidasoa Plana gauzatzen ari da eta, ondorioz, lur industrial hori interesatu guzien esku egonen da». Bailaran Bertizko Natur Parkea dagoela ere nabarmendu dute herritarrek, «Baztan-Bidasoaldeko turismoaren motore nagusia, eta proiektu honek modu larrian kaltetuko du bailararen irudia».
Baina bi egitasmo hauez gain, gaur egungo N-121-A errepide ondoan bertze industrialde bat eginen litzateke. Gasolindegi ondoan hotela, ospakizun handietarako jatetxea eta bi nabe hartuko lituzke 50.000 metro koadroko eremuak.
Bertizaranan lurraldea okupatzeko modeloa (EMOT delakoa) onartu berria da eta alkateak dioenez, zerbitzu publikora bideratutako lur eremuak herrigunetik hurbilago kokatuko dira. Apirilean hasierako onespena ematekoa zaio aldaketa hauek agertzen dituen Udal Hirigintza Planari eta alegazio epea zabalduko.
Industrigune horietako baten kontra alegazioak aurkeztu ditu bizilagun talde batek.