Inauteri egunak gogotsu iritsi ziren Legasara. Ortzegun gauean egin zen afariarekin eman zitzaien hasiera bi eguneko besta, algara eta mozorroen joan etorriei.
Ortziralean, egun epela eta eguzkitsua izan genuen etxez-etxe pusken bila joateko. Hauei esker, egun guztiko otorduak egin genituen. Eta arratsean elkartean musikaren alaitasunarekin gaueko ordu txikiak arte hainbat mozorro ikusteko aukera izan genuen.
Hala ere, egun haundia edo koadrilaka mozorrotzeko eguna larunbata izan zen. Euriak ez zuen egun koloretsua zapuztu.
Goiz-goizetik denetik aurki zitekeen kaleetan barrena: raperoak, zirujanoak, kazafantasmak, haurdun zeuden emakume koadrila, sevillanak, piratak…
Bazkari goxoarekin berriz ere indarrak hartu eta DJ-aren emanaldiarekin berandu arte egon ziren mozorroak dantzan.
Ortzegun Gizena eskolan
Arratsaldean, eskolako neska-mutikoak beren aita-amekin mozorroturik etorri ziren eskolara, pirataz jantzita. Hasierako orduan jolasten aritu ziren. Eta zer sorpresa hartu zuten atean kax-kax entzun eta ireki zutenean. Sorgin bat zen, urrutitik etorritako sorgin zaharra; kaixo eta agur erran ondotik, berriz ere alde egin zuen. Ondotik, merendu goxo-goxo bat izan zuten eta hagitz gustora pasatu zuten Ortzegun Gizen eguna.