Kezkatuak daude herritarrak. Narbartera etorri zen familia batek arazoak baino ez omen dizkie ekartzen eta ez dute irtenbiderik aurkitzen. Egoerari buelta emateko helburuarekin, Malerrekako Mankomunitateko gizarte langileekin eta bertze eragileekin ere bildu izan dira, baina arazoa ez da oraindik konpondu.
Bertze urratsa elkarretaratzeak egitea izan da. Hala, abuztuaren 20an eta 21ean bi mobilizazio egin ziren egoera salatzeko. Ez dugu eraso gehiago nahi, aski da, elkarbizitza duina eta Bakean bizi nahi dugu zioten kartelen gibelean hainbat herritar bildu zen plazan.
Barrideek prentsara igorritako oharrean ageri denez, «familia zakarra eta erasokorra da» eta horren ondorioz, herritarrak «beldurtuak» daude. Azken bolada honetan heriotz-mehatxuak hartu dituztela eta herritarren arteko elkarbizitza kaltetu dutela ere salatu dute. Gisa berean, «herritarrok hain arruntak diren gauza batzuk egiteari utzi diogu, plazan edo ostatuan egoteari, adibidez, erasoa jasanezina delako».
Miren I. Iriartek TTIPI-TTAPAri adierazi dionez, bi elkarretaratzeak egin ondotik, pixka batean esperoan egonen dira, «ea zerbait aldatzen den». Herritik alde egitea edo erasoak bertan behera gelditzea eskatzen dute, eta egoerak berdin segitzen badu, mobilizazioak egiten segitzeko asmoa dutela baieztatu du Iriartek.
Gizarte Zerbitzuekin bildu eta elkarretaratzeak egin dituzte
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun