Kezkatuak daude Narbarteko herritarrak. Narbartera etorri zen familia batek arazoak baino ez omen dizkie ekartzen eta horixe salatzeko elkarretaratzeak egin dituzte asteburuan, joan den ortziralean lehenbizikoa eta larunbatean bigarrena. Hala, Ez dugu eraso gehiago nahi, aski da, elkarbizitza duina eta Bakean bizi nahi dugu zioten kartelen gibelean hainbat herritar bildu zen plazan.
Narbarteko Kontzejuko zinegotzi batek hedabideetara igorritako ohar batean ageri denez, “familia zakarra eta erasokorra da” eta horren ondorioz, “herritarrak beldurtuak gaude”. Azken bolada honetan heriotz-mehatxuak hartu dituztela eta herritarren arteko elkarbizitza ere kaltetu dutela ere salatu dute. Gisa berean, “herritarrok hain arruntak diren gauza batzuk egiteari utzi diogu, plazan edo ostatuan egoteari, adibidez, erasoa jasanezina delako”.