Larunbat honetan besta eguna izanen da Bertizaranan. 2001ean egin zen lehenbiziko aldiz Bertizaranako Eguna, eta aurten ere ez dute hutsik egin Bertizaranako gazteek. Udalaren, Legasa eta Narbarteko kontzejuen eta BKZ enpresaren laguntzarekin, egun osoko egitaraua antolatu dute.
Ohikoa den bezala, 9:00etan suziriak bota eta gosaltzera joanen dira. Segidan, 9:30ean, dianak izanen dira Oieregin, Narbarten eta Legasan. Jende guziak ongi pasatzeko animazioak prestatu dituzte. 10:00etan soka zirkuitoak eginen dira, BKZren eskutik. 11:00etan, zesta punta partiduak jokatuko dira, eta 12:30ean bertako dantzariek dantza-saioa eskainiko dute.
Eta gorputzari astinaldia eman ondotik, 14:30ean herri bazkaria. Horretarako txartelak hartu beharko dira. Eta bazkalondoa animatzeko, Agerralde akordeoilariak joko du. 18:00etarako sokatira apustua prestatu dute, Bertizaranako gazteen artekoa.
22:00etan afaria izanen da frontoiko kanpan edo plazan eta ondotik,egunari behar bezalako akabera emateko, gaupasa Trikidantz taldearekin. Besta noiz arte arte luzatuko den, hori norberak ikusiko du.