Elikagai ekologikoekin hezi nahi dituzte neska-mutikoak Ricardo Baroja eskolan eta helburu horrekin eta elikadura eredu osasungarria eskaintzeko eskolako jangelan produktu ekologikoak eskaintzeari ekin diote.
Ohiturak aldatzea izan da guztiaren abiapuntua: «mundu ero hau aldatzeko pausuak eman behar ditugu, eta herritarrok gauza batzuk egin ditzazkegu eta horietako bat, gure kontsumo ohiturak aldatzea da eta ahalik eta hurbilenekoak eta garbienak diren produktuak kontsumitzea». Horrela azaldu digu Amaia Goia Ricardo Baroja ikastetxeko gurasoak. Bere irudiko, «osasunaren aldetik denok dakigu zein onuragarria den horrelako elikagaiak erabiltzea, pestizida eta produktu kimikoekin ekoiztutakoak erabili beharrean. Jangela eskolako bertze atal bat da eta gure haurrak elikadurak gure bizitzan duen garrantziaz jabetuta hezi nahi ditugu».
Oraindik gauza berria da eskolan, 2010/2011 ikasturte honetan egin baitute janari ekologikoaren aldeko apustua lehenbizikoz. Oraingoz «oinarrizko elikagaiak» sartu dituzte menuan, lehenagoko elikagaiak, ekologikoak eta integralak direnekin ordezkatuz. Etorkizunera begira, ekimena indartzen joan nahi dute: «gure asmoa ondoko urteetako elikagai gehienak ekologikoak izatea da. Datorren urterako baratze ekologikoa martxan jarri behar dugu». Honela, lurrarekin harreman naturala berreskuratu nahi dute eta baratzeko produktuak jangelarako erabiltzeko asmoa ere badute.
Ikasturte honetan ekoizleari zuzenean erosita lortu dituzte produktuak: «Berako baratzetakoak, Bortzirietakoak, Nafarroakoak... Modu honetan lortzen ez ditugunak produktu ekologikoen hornitzaileei erosi dizkiegu».
Jangela ekologikoaren ekimenarekin, gurasoek zein haurrek harrera ona izan dutela adierazi digu Ricardo Barojako gurasoak: «aldaketa haurrentzat hagitz onuragarria izan dela ikusita, hagitz jarrera ona izan dute gurasoek. Eta haurrek ere hagitz ongi erantzun dute. Batzuei hasieran arraroa egin zitzaien, baina ikasturte bukaeran hagitz balorazioa ona egin dugu».
Menuan elikagai ekologikoak sartzeak gastua igo egiten du, baina Goiaren ustetan, ez da hainbertzerakoa: jangela batean gastu gehiena pertsonalarena denez, elikagaietan %20 gehiago gastatzeak ez du halako igoera erran nahi».
Eta jangela ekologikoaren erantzunarekin pozik, bertze ikastetxeei luzatu die deia Berako gurasoak: «jangela zerbitzurako janaria bertan egiten duten bertze ikastetxeak animatuko nituzke, pausoak emateko eta ahal den neurrian horrelako produktuak erabiltzeko».
BERTZE IKASTETXEEI DEIA
«Bertze ikastetxeak animatuko nituzke, pausoak eman eta ahal den neurrian horrelako produktuak erabiltzeko»
Amaia GOIA
Ricardo Barojako gurasoa