Kaxernagaina ingurua egokitu egin nahi du Udalak eta horretarako, aterpe turistikoa egiteko azpiegiturak egokitu, eskaintza turistikoa dibertsifikatu eta bideragarritasun azterketa egiteko proiektua idazteko deialdia egin du. Gehienez ere 72.000 euroko aurrekontua izanen du eta hasierako proposamena urriaren 20a baino lehen aurkeztu behar da Herriko Etxean. Aurreproiektua azaroaren 20a baino lehen aurkeztu behar da eta oinarrizko proiektua, berriz, abenduaren 15erako.
Baldintza pleguaren arabera, aterpeak lehen mailakoa izateko araudia bete behar du: 50 bat lagunendako jangela, harrera, denda, komunak, aldagela eta dutxentzako lekua, biltegia eta logela bikoitzak, familiendako logelak komunekin eta 2, 3, 6 eta 10 literakoak...
Gaztetxea Errespetatu
Kaxerna Frankismo garaian mugimenduko emakumeen aterpe gisa erabili zen eta gero Nafarroako Gobernuak hartu zuen, ikasleen erabilerako. Baina 1983 inguruan itxi eta geroztik aunitz hondatu da, erabilerarik eta mantenindurik gabe. Berriz Udalaren esku gelditu zenerako, hondatua zegoen eta egokitzeko inbertsio handia behar duenez, ezin izan du orain arte deus egin.
Kaxernaren zati bat Gaztetxea da eta zati hori errespetatu beharko dela dio baldintza pleguak. Edozein moduz, eraikinaren egoera dela eta, aurreproiektua idazterakoan dena bota behar den edo moldatzearekin aski den aztertu beharko da.