Kintoan Barna taldean zuzendari posturako lan deialdia zabaldu dute

Ttipi-Ttapa

Iparraldeko zein Nafarroako 11 udalerrik osatu dute Kintoan Barna LLETa (Lurralde Lankidetzarako Europako Taldea), «mugaz gaindiko lankidetza eta gobernantzarako tresna iraunkorra» izan nahi duena. Europar Batasunak lagundu du proiektuan eta zehazki Aldude, Banka, Baigorri, Urepele, Baztan, Auritz, Esteribar, Erroibar, Luzaide, Eugi eta Zubirik parte hartu dute, «ekonomian, gizartean eta ingurumenean» eragiteko.

Testuinguru horretan, taldeak zuzendari bat kontratatu nahi du administrazioa, finantzak eta gobernantza gidatzeko; estrategiak eta proiektuak garatzeko; erakundeekin koordinazio eta ordezkaritza lanak egiteko; eta kudeaketa orokorrerako. Lanaldi osoko postua izanen da, 2027ko lehen hiruhilekoan hasteko.

Lanpostua lortzeko unibertsitateko master titulua eskatzen dute Zientzia politikoetan eta Zuzenbide publiko edo europarrean. Horrez gain, bortz urteko lan esperientzia eta guttieneko B2 maila euskaraz, frantsesez eta gaztelaniaz.

Interesatuek Urepeleko Herriko Etxera (mairie.urepel@orange.fr) bidali beharko dute curriculuma PDF formatuan eta aurkezpen gutun bat hiru hizkuntzetan. Azaroaren 30ean 12:00etan hetsiko dute aurkezteko epea.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun