Nafarroako arpana txapelketa mistoaren finala jokatuko da urriaren 17an, larunbatean 13:00etan Antsoaingo Rafael Alberti plazan (euria eginen balu Idaki pilotalekuan). Igantziko bestetan egindako kanporaketako bortz bikote onenak lehiatuko dira: Iraizotzeko Josetxo Barberena eta Eltsoko Ainhoa Iraizoz, Arraiozko Dani Saldias eta Txantreako June Etxeberria, Elkarteko Iosu Huarte eta Iruñeko Uxue Rodriguez, Berriozarko Oier Aizkorbe eta Arraitzeko Miren Eizmendi eta Iruritako Saioa Dendarieta eta Manex Mitxelena. 45 ontzako enborrari 15 epai egin beharko dizkiote.
Larunbatean 13:00etan lehiatuko dira bortz bikote txapelketa nagusian eta bertze lau 21 urtez beheitiko kategorian
Txapelketa nagusiarekin batera, 21 urtez azpikoa ere jokatuko dute, lau bikoterekin: Antsoaingo Maider Ruz eta Joritz Biurrun, Berriozarko Elur Martiartu eta Iruñeko Urko Larunbe, Berriozarko Irati Aguas eta Unai Fernandez eta Arraiozko Eider Urrutia eta Julen Urrutia.
Azkenik, Antsoaingo herri kirol taldearen erakustaldia ere izanen dute.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.