«Ezinbertzekoa da gauzak herriarekin, jendearekin batera pentsatzea, ahalik eta herri proiektu nolabait komuna josi edota gorpuztu ahal izateko», horrelaxe adierazi zuen EH Bilduk Nazio Elkarrizketak egitasmoa abiarazi zuenean. Bide batez, karrikara atera eta herritarrak aditzeari ekin zion, Hego Euskal Herriko eragile eta norbanakoekin harremandu eta gai diferenteen inguruko iritzia zuzenean biltzeko.
Baztanen 60 dira Baztango EH Bilduk hilabeteotan egin dituen elkarrizketak. Eta ez hori bakarrik: hartu-emanetan bildutakoa osatzeko bailarako etxe guzietara eskuorri bat bidali du, zeinetan galdetegi labur bat heldu den.
Karrikara ateratzearen zergatia politika instituzioetatik at karrikan ere egiten dela sinestean oinarritu da. Are gehiago, herriaren etorkizuna eraikitzeko herritarrak aditu eta kontutan hartu behar direla sinestean datza proiektuaren ardatza: «Denona dena denon artean kudeatu, antolatu eta erabaki behar da».