Baztango Ernaik hainbat deialdi egin ditu uda honetan Euskal Herria Irabaztera kanpainaren barnean, izen berarekin irailaren 13an Donostian eginen duten mobilizaziora deitzeko.
Lehenbizikoa bihar hasiko dute, uztailaren 1ean, Gure bailaran, gure ikurrak! izenpean. Azaldu dutenez, «Baztan toki masiboki turistifikatua da, eta garrantzitsua ikusten genuen leku zehatz batzuetan gure ikurrak egotea, haien falta sumatzen baitugu». Horretarako, «propaganda hitzorduak eginen ditugu, Baztanen behar bezalako propaganda egin eta Euskal Herria Irabaztera dinamika behar bezala lantzeko. Aste honetan izanen dugu lehenbiziko hitzordua: asteazkenean, 19:30ean Iriarte pilotalekuan».
Gainera, «erabaki dugu uda honetan ikurrinak paratu behar ditugula toki turistikoetan, eta aste honetan lehenengoa, Legaten». Uztailaren 2an 09:30ean Baztango Gaztetxetik abiatuko dira mendi kaskora.