Urteroko legez, irailean ospatuko zuten Elizondon Behi Azienda Piriniotarraren Lehiaketa-enkante Nazionala. Eginen balitz, aurtengoa XXXVII. edizioa izanen litzateke. Dermatosi nodular kutsakorra behi aziendei eragiten dion gaixotasuna izanik, aurten feriarik ez egitea erabaki du Baztango Udalak.
Behi Azienda Piriniotar Hazleen Elkarteak bilkura izan zuen pasa den ekainaren 12an eta gaixotasunaren hedapenak eragin duen egoeragatik, aurten, feriarekin aitzinera ez segitzeko erabakia hartu zuen. Behin erabakia hartuta, Baztango Udalari eman zion horren berri.
Gaixotasunaren aitzinean, tratamendua diferentea izan da lurralde bakoitzean; txertoen kontua, erraterako. Kasurako; Euskal Autonomia Erkidegoan, Kantabrian eta Aragoin debekatuta dago behi azienda piriniotarrak parte hartzen duen ospakizun oro egitea. Nafarroan halako debekurik ez badago ere, antolatzaileek adierazi dutenez, «arras zaila» izanen litzateke Nafarroatik kanpoko aziendak feriara ekartzea, eta hori horrela, egitasmoak berezkoa duen kutsu nazionala galduko lukeela aipatu dute. Horregatik, lehiaketa-enkantea bertan behera uzteko hautua hartu dute. Alabaina, hurrengo urteetan Elizondon antolatzen segitzeko asmoa erakutsi dute.