Jesus Goñi Telletxea 1947an Oronozko Barbereneko bordan sortu zen, eta gazte joan zen Ameriketako Estatu Batuetara. Urte luzez Nevadan eta Idahon bizi izan da eta hamarkadetan parte hartu du euskal jaialdi, topaketa eta bertso saioetan, bertsolaritzaren ordezkari ospetsuenetako bat bihurtuz bertan.
Ttikitatik bertsozalea baldin bazen ere, Ameriketan garatu zuen zaletasun hori eta Jesus Arriada, Martin Goikoetxea eta Jhonny Curutchetekin batera ibili zen hainbat kultur ekitalditan herriz herri, lau hamarkadatan. Lan horregatik, Ameriketako Estatu Batuetan arte tradizionalak saritzeko ematen duten saririk handiena, National Endowment for the Arts erakundeak emandako National Heritage Fellowship Saria eskuratu zuen 2003an. Nazio Batuen Erakundearen egoitzan ere kantatu zuten, New Yorken.
Jesus Goñik gustura hartu zuen saria eta gustura izan zen bertso bazkarian ere, Sustrai Colinarekin eta Joanes Illarregirekin batera.
