Jaizkibel Konpainiak Hondarribia Berdintasun Hiria saria banatu zuen joan den ortziralean Hondarribiko Itxas Etxean. Baztango Plazara Dantzara taldeari egin diote aitortza aurten eta taldeko kide ugari igo ziren oholtzara saria biltzera.
Jaizkibelek azaldu zuenez, «Bidasoak lotzen ditu Baztan eta Hondarribia, eta, azken urteetan, jaietan emakumeen parte hartzearen aldeko aldarrikapenak ere lotzen gaitu: hemen alardean, eta han mutil dantzetan. Baztango mutil dantzetan emakumeen dantzatzeko nahia eztabaida iturria izan da. Ez da bide erraza izan, botere eta genero harremanek ere berdin-berdin funtzionatzen dute Baztanen eta Hondarribian. Baina, ibilbide gatazkatsua izan arren, emakumeak lortzen ari dira jaietan plazan dantzan aritzea».