2024an lehenbiziko aldiz ospatu zuten Baztangoizako Besta Arizkunen, herriko zenbait gazteren ekimenez. Amaiur, Arizkun, Azpilkueta eta Erratzuko «herritarren arteko erlazioak sendotzea» zuen helburu. Arrakastatsua izan zen eguna, eta arizkundarrek amaiurtarrei pasatu zieten lekukoa. Hortaz, aurten Amaiurren eginen dute bigarren edizioa, maiatzaren 30ean.
Egitarau oparoa
11:00etatik aitzinera haurren eta helduen herri kirol erronkak eginen dituzte. 14:00etan, berriz, zikiroa izanen da, musikaz alaitua. Ondotik dantzaldia izanen da Olgetan erromeria taldearen eskutik. Afaltzeko Perurena Burger hanburgesak jateko aukera izanen dute, eta gauen bestak segida izanen du Jotatxo DJarekin 23:00etatik aitzinera.
Zikiroko txartelak salgai daude Amaiurko Hotelean, Arizkungo Dolaetxean, Erratzuko Altxuko dendan eta Azpilkuetako alkatearen bitartez, 35 eurotan helduendako eta 15 eurotan 12 urtetik beheitikoendako.