2023an abiatu zuten Baztan-Bidasoko udalek Oronoz-Mugairiko Zunda etxean desgaitasuna duten pertsonendako eguneko zentro bat egiteko proiektua. Aurten bigarren faseko eraikuntza lanak hastea aurreikusi dute, eta proiektuak totalean 600.000 euro inguruko kostua izanen du. Horietatik Nafarroako Gobernuak 416.524 euro ordainduko ditu, eta gainerakoa eskualdeko udalerriek.
Carmen Maeztu Eskubide Sozialetako, Ekonomia Sozialeko eta Enpleguko kontseilariak lanak bisitatu zituen atzo, eskualdeko alkate, ordezkari eta familiekin batera. Eraikinak hiru solairu eta 553 metro karratu izanen ditu guztira, eta desgaitasuna duten 15 lagunendako tokia izanen du. Baztan-Bidasoko 21 udalerrietan emanen du zerbitzua: Urdazubi, Zugarramurdi, Baztan, Bertizarana, Doneztebe, Elgorriaga, Ituren, Zubieta, Oiz, Urroz, Donamaria, Sunbilla, Beintza-Labaien, Saldias, Eratsun, Ezkurra, Etxalar, Arantza, Igantzi, Lesaka eta Bera.