Joan den urtean atsedenaldia egin ondotik, Iruritako gazteek bertze behin antolatu dute mendi duatloia, eta borzgarren edizioa izanen da aurtengoa. Maiatzaren 1ean eginen dute proba eta izena ematea dagoeneko irekia dute kirolprobak.com webgunean, apirilaren 26ra arte.
Banaka edo binaka egiten ahalko da lasterketa eta guztira 24,8 kilometro izanen ditu ibilbideak, horietatik 8,8 lasterka egiteko eta 16 bizikletan. Bakarka parte hartzeko 25 euro ordaindu beharko dira eta erreleboka, berriz, 35 euro.
Baztan-Bidasoko Mendi Duatloi Txapelketa
Aurten, gainera, Baztan-Bidasoko Mendi Duatloi Txapelketa eginen dute lehenbiziko aldiz: Iruritako, Sunbillako eta Igantziko mendi duatloiek osatuko dute txapelketa, hiru herrietako antolatzaileek elkarlanean sortua. Txapelketarako guttienez hiru probetatik bitan parte hartu beharko da, eta bikoteen kasuan, berdinak mantendu beharko dira lasterketa guzietan. Apirilaren 11n izanen da Sunbillako duatloia, eta Igantzikoa, berriz, apirilaren 25ean.