Berdintasun Zerbitzuak azaldu duenez, «aurtengo leloa Feminismoari esker… gaur izan, egon, esan eta erabaki dezakegu da». Honekin «funtsezko errealitate bat» gogoratu nahi dute: «gaur egun barneratuta ditugun eta gure eguneroko bizitzaren parte diren eskubide eta askatasun aunitz mugimendu feministaren borrokei eta historian zehar emakumeen antolamendu kolektiboari esker lortu dira. Diskurtso antifeministen edo erredukzionisten bidez feminismoa zalantzan jartzen edo deslegitimatzen den testuinguru sozial batean, haren eginkizun erabakigarria aldarrikatu behar da garapen sozialean, eskubideen hedapenean eta sistema demokratikoaren indartzean».
Udalak herritar guztiak gonbidatu ditu elkarretaratze instituzionalean parte hartzera, «lortutako eskubideak aitortzeko, oroitzeko eta defendatzeko keinu kolektibo gisa, eta jendarte bidezkoago, berdintasunezkoago eta demokratikoago batekiko konpromisoaren adierazgarri gisa».