Almandozko eskolako handien gelakoek, hau da, Lehen Hezkuntzako 2. mailatik 6. mailara bitartekoek, 'Harresiak: atzo, gaur eta bihar' proiektua landu dute lehenbiziko hiruhilekoan. Hainbat gauza ikasteko eta hausnartzeko aukera izan dute. Alde batetik, harresiak zer diren eta zein mota dauden, materialaren arabera.Bertzetik, zertarako eta nork aginduta eraikitzen dituzten, eta munduko zein tokitan dauden. Azkenik, «beharrezkoak ote diren hausnartzeko parada izan dugu eta zera ondorioztatu dugu: hauek eraistea beharrezkoa dela, mundu eta pertsona libreak izan gaitezen».
Gaiari buruz ikasi eta hausnartu bitartean, ikasleek maketa bat sortu dute. Eskolako sarreran paratu dute ikusgai eta nahi duen herritar oro gonbidatu dute ikustera.
