Zahar etxeak eta Baztango Udalak San Anton eguna antolatu dute aurten ere. Goizean txistulariak eta Alazne Untxalo eta Bittor Elizagoien bertsolariak zahar etxean izan ziren, eta nahiz eta egoiliarrak barnean gelditu eguraldi tristeagatik, bertsolari eta musikariak plazarat joan ziren ondotik. Bertan, bertso eta txistu artean, Baztan zopak banatu zituzten.
Goiza borobiltzeko, urteroko zozketa egin zuten Balleko Etxetik. Beti bezala, lau haur izan ziren zenbaki saridunak atera zituztenak: Zigako eskolako Inar Alzuguren eta Aroa Azkarate eta Baztan Ikastolako Ekain eta Xane Dufurrena anai-arrebak. Bertako produktuekin osatutako lau saski zozketatu zituzten eta 1.873 izan zen zenbaki irabazlea. Bigarren sariduna 2.405 izan zen, hirugarrena 1.985 eta laugarrena 2.571.