«Postal turistikotik ihesi doan Baztan batean» oinarritu du bere azken liburua Pratek. Aitzineko liburuen haritik segituz, presente du Telleria egitasmo urbanistikoa, Aroztegiko proiektuaren fikziozko paralelismoa. Horrez gain, «mugako herrietan historikoki errealitate bat izan den migratzaileen pasak» hartu ditu ardatz, baita Itoizko urtegiaren kontrako mugimendua ere.
Muga hautsien hegalak
Larrak –lehen Lurra eta gero Larru izandakoak– bizitza berri bat hasi du: drogak eta gehiegikeriak utzita, gaztak egiten ikasi du Pirinioan, eta artzaintzan dabil orain osaba Luzio eta Mirtaren Belzebenea baserrian, pandemia garai betean.
Bizimodu lasaia eraman nahi izanda ere, berez datoz arazoak, ordea: batetik, muga pasatu nahi duten gazte afrikarrak bolada batean gordetzeko eskatuko diete lagun batzuek; bestetik, Telleria urbanizazio proiektuarekin aurrera jarraitu nahi dute espekulatzaile eta agintariek; azkenik, Itoizko Solidarioen borroka zaharrak ere bere lorratza izango du hemen.
Baztan egiazko, kontraesanez eta bizinahiz betetako baten erretratu zorrotz bezain maitagarria eskaintzen duen trilogia osatu du honenbestez Ernesto Prat Urzainkik. Bizitza duinen aldeko borrokari alaitasunez eusten dioten guztientzako omenaldia.