Aurten ere elkarretaratzeekin segituko du Baztango Osasun Plataformak, «kalitatezko osasun sistema publikoa» aldarrikatzeko helburuarekin. Abenduan egindako elkarretaratzean «osasun sistema publiko duina» eta «Elizondoko Osasun Zentroan lantalde egonkorra bermatzea» eskatu zuten. Gainera, kontsultategi ttikietako profesionalek Nafarroako Osasun Departamentutik hartzen duten tratua «eskasa» dela salatu zuten, eta Eskualdeko Osasun Kontseiluari «garrantzi eskasa» aitortzen zaiola.
Nafarroako Gobernuaren 2026ko aurrekontuak onartuta, osasun arloko diru partida «eskasa» dela adierazi zuten, «batez ere lehen mailako arretari dagokiona: farmaziako gastuek pisu handia hartzen dute eta zentro pribatuetara bideratzen den diru kopurua nabarmenki handitu da».