Olentzerok urteroko bisita egin zuen; aitzinetik neska-mutikoak eskean ibili ziren, kantuan, baserritarrez jantzita, gozoak biltzen. Ondotik, eskolako oporrak baliatuz, gurasoen eskutik haurrendako bi arratsaldez eskulan tailerrak eskaini ziren.
Urteberriko urtatsen ondotik, Errege egun bezperetakoak egin zituzten, joareak bizkarrean paratuz, herrian eta baserrietan bisita eginez. Eta akitzeko Errege eguneko elurra! Herrian jostari ibiltzeko aukera eman zuen. Eta su ondoetan atseden hartzekoa ere.
Paregabe joan dira besta egun hauek, eta orain Orakunde eta inauteak otsailaren 6 eta 7an izanen dira.
Nabarmentzekoa da gaur egun arte gabon sasoian etxez etxe haurrak ibiltzen diren egun bakoitzerako kantatzen dituzten kantak. 24an Olentzero eta eguberrietakoak dira, 1ean Urte berri berri, zer dakarrazu berri… eta Errege bezperan: Trakatan-trakatan, hiru erregeekin, goazen goazen Beleenera kantak izaten dira. Belaunaldiz belaunaldi ailegatu zaizkigu eta herriko ondare dira. Zoragarria da etxeetako ateetan etxeko andreekin batera kantatzea, bertze garaietako ohiturak entzun eta ikastea.
Ea kantak ez diren eteten eta gure ttikiek ere, guk eta gure arbasoek egin bezala, ahoz ahoko herri ondare hau kantatuz bizirik mantentzen duten.