Antolatzaileek azaldu dute ohiko egitura klasikoarekin segituko dutela, eta hala, astelehenean, asteazkenean eta asteburuan eginen dituztela ekitaldiak. «Nobela beltz edo belztasunarekin harremana duen literatura dezente izan da aurten eta guk horren lagina ekarriko dugu».
Egitarauaren lehen xehetasunak aletu dituzte: ilbeltzaren 19an, astelehena, Guillem liburuaren kontu arituko dira Amaia Apaulaza itzultzailearekin; asteazkenean, hilaren 21ean, Ernesto Praten Muga hautsien hegalak liburua izanen dute mintzagai eta larunbatean, berriz, Miren Agur Meaberen Amorante frantsesa, Amaiur Epherren Haize beltza eta Iñaki Dorronsororen Azpijokoa Azpiazun landuko dute.
Liburu horiez gain, mahai ingurua, susmagarrien gaua, itzuli beltza eta antzerkia ere izanen dira hamabigarren edizioan, baina, aitzinerago jakinaraziko dituzte xehetasunak.
Oraingoz, ilbeltzaren 24ko bazkarirako txartela lortzeko aukera ireki dute. Helbide honetarat eskribituz lortu daitezke: ilbeltzabaztanen@gmail.com