Independentziaren Egunaren erreklamu gisa; Malerrekatik, Bortzirietatik, Baztandik zein bertze zenbait lekutatik hurbildu zen jendea larunbatean Iruritara. Hala, egun osoko egitarau betea prestatua zuten; goizean paxaka kirol erakusketa, azoka ttikia eta hitzaldiren bat, eguerdian kantu zahar bazkaria, ondotik elektrotxarangarekin herrian barna itzulia eta ilundu zuen horretan, Ernairen ekitaldia eta kontzertuak hurrenez-hurren.
Kantu zahar bazkarian 60 lagunetik goiti bildu ziren eta gauean, berriz, erreboteko plazan paratua zuten karpa bete-beterik ikusteko aukera egon zen ordu batzuetan. Bide batez, hantxe bildu ziren herritarrak aurtengo abenduaren 13an, independentziaren aldeko aldarriak plazaratzera eta elkarren arteko goxotasunaz disfrutatzera.