Aldaketa klimatikoarekin kezkatuta, Baztango Talde Ekosoziala elkarteak «tinko» eusten dio «mundu jasangarriago bat bermatzeko bideari». Helburu horrekin, hainbertze hausnarketa eta hitzordu antolatzen ditu eta, oraingoan, azaroaren 15ean Jason Hickel antropologo ekonomikoak Baztanen geldialdia eginen duela iragarri du.
Akelarre kulturguneak eta Baztango Talde Ekosozialak antolaturik, Jason Hickel antropologo ekonomikoak Arizkunenean solasaldia eskainiko du, eta egungo krisi ekosozialaz eta kapitalismoak larrialdi klimatikoan duen eraginaz mintzatuko da. «Ekonomiaren etengabeko hazkundea kapitalismoaren ezaugarrietako bat» dela adierazi du talde ekosozialak. Horrek, bere irudiko, «hainbertze ondorio sozial, politiko, kultural eta ekologiko ekarri ditu, eta oraingo fase historikoan, Palestinaren gisako genozidioa eta klima larrialdia».
Bidenabar, analisi historikoak aparte, gaur egungo joerak izanen ditu aztergai eta Txinaren kasua hartuko du adibidetzat. «Horrela, desberdintasun globalez, ekologia politikoez, post garapenaz eta desazkundeaz, eta ekonomia ekologikoaz ariko da».