Elkarretaratzearen hasieran, Guttieneko pentsioa = Guttieneko soldata aldarrikapena hartu zuten hizpide atzo pentsiodunek. Eusko Jaurlaritzak eskaera horri «ezezko borobila» eman diola salatu zuten, «145.142 pertsonek sinatutakoari kontra eginez». Kolpe «latza» izan dela aipatu zuten, eta aldi berean, horrek Eusko Jaurlaritzaren «jarrera antidemokratikoa» erakusten duela. Horren harira, buruilaren 20an Bilbon, Donostian eta Gasteizen manifestazioak egitekoak direla oroitarazi zuten; hilaren 22an EAJ eta PSEren egoitzen aitzinean elkarretaratzeak eta 25ean Gasteizen, Legebiltzarraren aitzinean.
Nafarroan ere aldarrikapen hori dute: «Hemen ez da landu herri ekimen legegilerik, baina guttieneko pentsioa guttieneko soldatarekin parekatzeko aldarria zuzenean interpelatu» nahi izan zioten alderdi politikoei eta Nafarroako Parlamentuari.
Baztango Osasun Plataformarekin bat
Gainerakoan, Baztango Osasun Plataformaren urteurrenaz aritu ziren atzo pentsiodunak: «Plataformak urtebete egin du mobilizazioekin, baina arazoak konpontzetik urrun gaude». Aldarrikapen pankartak biltzen duena ekarri nahi izan zuten gogora: Osasun Sistema Publiko Duinaren alde. «Ba oraindik ez da murriztu pribatura desbideratzen den dirua, eta denbora berean arreta publikoak ahul segitzen du». Pentsiodunen irudiko, «ezinbertzekoa da sistema publikoa indartzea, horrek bermatuko lukeelako arreta duina. Bertzela, begiratu zer pasatu den anbulantzien zerbitzuarekin; publiko bihurtutakoan lan baldintzak eta zerbitzuak hobetu dira. Eta gaiarekin lotuta, bihar, Elizondoko osasun etxean egitekoa duten elkarretaratzean parte hartzeko deia egin zuten. 19:30ean izanen da.
Palestinari elkartasuna
Hitzordua Israelen genozidioa salatuz eta Palestinari elkartasuna adieraziz borobildu zuten. Nazioarteko arduradunek «gelditzeko ez dutela deus eraginkorrik egin» kritikatu zuten. Eta kontrara, Ibaitik itsasora elkartasun martxa txalotu zuten, parte hartzeko deia eginez.
Hurrengo hitzordua
Urriko elkarretaratzea, beti bezala, hilabeteko hirugarren astelehenean eginen dute: urriaren 20an, 12:00etan, Beran.