Denera, 800 kilo zikiro, 140 litro salda eta bertze horrenbertze litro kafe banatu zituzten. Piperradarako bertze 80 kilo haragi, 40 poto tomate, 60 kilo piper eta 16 kilo tipul behar izan zituzten eta guztiarekin, ederki bazkaldu zuten elizondarrek.
Bazkalondoan, Elutxa txarangarekin ibili ziren karrikaz karrika. Elizondoko Fanfarrearen eskutik, Ziga plazan egin ziren dantza herrikoiek ere jendetza erakarri zuten arratsaldean. Fanfarrearekin Amadeo Arretxeak, Iñigo Morenok, Josu Juanenak, Asier Bertizek, Aingeru Olabek, Tomas Laborrak, Juan Antonio Agerreak eta Hasier Azurmendik jo zuten.
Igandean mus txapelketa
Bezperan, igande arratsean, Falfarak elkarteak hirugarren aldiz antolatutako mus txapelketa jokatu zuten. Oihan Arguelles eta Unai Jauregi amaiurtarrek irabazi zieten finalean Iker Plaza eta Jon Moreno elizondarrei. Hirugarren Jon Osakar eta Aingeru Olabe izan ziren eta laugarren Ganix eta Felix Mena.
Larunbateko gertakariak alde batera utzita, besta bikainak izan dira Elizondokoak. Besta Batzordeak antolatutako kontzertuetan (Andoni Ollokiegi eta Kaparrak ortzegunean, Dupla eta Janus Lester larunbatean…) jendetza erakarri dute. Orain, guttiago falta da 2026ko Santio bestetarako.