Aspaldiko urteetatik hona, auzolana gure herrietako funtzionamenduaren oinarria da. Berroeta bezalako herri ttikietan, behar-beharrezkoa da herriak aitzinerat egiteko. Auzolana borondatez egiten den lana da; herritarren artean eginbeharrak banatu eta ekin! Lastimaz, anitzetan jende guti elkartu ohi da hitzordu hauetara; eta maiz, beti jende beretsua! Berroetan lau bat auzolan egun egoten dira urtean, larunbat goizetan normalki.
Azken auzolan hitzordua larunbat honetan izan da, eta bertze anitzetan baino parte hartze handiagoa izan du. Auzolan anitz eta koloretsua izan da; adin guztietako herritarrek ekin diote herria txukundu eta bestetako prestatzeari! Garbi gelditu da horrelakoetan denendako lana egoten dela eta gauzak elkarrekin eginez gero, errazago eta umore hobez egiten direla! Horrelako auzolan egun gehiagoren alde, gora elkarlana!