Baztango Udalak adierazi duenez, Erratzuko sarrerako harrera gunea, ibilgailuak uzteko eta Xorroxingo ur jauziko bisitak kudeatzeko erabiltzen dena, hetsita egonen da Aste Saindura arte. Udalaren erranetan, egokitzapen eta hobekuntza lanak egiten ari dira Next Generation funtsaren bitartez, «harrera eremua atseginagoa izan dadin eta kudeaketa hobeki antolatu ahal izateko». Lanak apirilaren 17ko akituko dituztela aurreikusi dute.
Harrera gunea martxan izatean, Erratzu bisitatzen duten pertsonei «aparkaleku bat erreserbatzeko betebeharra» azpimarratu die udalak. Gainera, «herrian kolapsoak eta eragozpenak saihesteko helburuarekin, gaituak ez dauden eremuetan aparkatzen duten ibilgailuak kontrolatuko dira». Horrez gain, erreserbak, oraingoz, debalde izanen direla jakinarazi dute, «aplikazioa eta kobratzeko ordenantzak garatu bitartean».