Nafarroako Gobernuko Merkataritza eta Kontsumo Zuzendaritza Nagusiak Nafarroako lau enpresaren parte-hartzea bultzatu du Artisautzaren Europako Egunen karietara, eta zeta pintatu, kaiku eta forja tailerrak bisitatu ahal izanen dira igandera arte. Eskualdeari dagokionez, Erratzuko Ion Dufurrena kaikugileak Iriarteko bordan duen tailerra bisitatzeko aukera izanen da apirilaren 1ean eta 4an, asteartean eta ortziralean, 16:00etatik 17:00etara. Bisita euskaraz edo gaztelaniaz egiteko aukera emanen du, baina komeni da aitzinetik telefonoz deitzea (644 25 41 06), leku mugatua baita.
Dufurrenaren tailerraz gain, Meanoko Puch tailerreko zeta gaineko pinturak, Izurdiagako Braun burdinola eta Aiegiko burdinola ikusteko aukera izanen da.