Erdiz Bizirik plataformak Magnari Kaka zozketa eginen du aurten ere eta dagoeneko jakinarazi dute data: abuztuaren 30ean Elizondon izanen da. Txartelak kinto bestetan banatuko dituzte eta norbaitek berean saldu nahi baditu, plataformarekin jarri beharko du harremanetan. Ohiko denda eta komertzioetan ere salgai izanen dira.
Iaz bezala, hiru zenbaki irabazleak «modu berezian» hautatuko dira: «zelai haundi bat karratutan zatitu eta espazio horietako bakoitza 2,5 euroren truke alokatu ahalko da. Azienda ibiliko da zelai horretan, eta erreserbatutako karratutxo horietan aziendak kaka egiten duen bakoitzean, zati horren zenbakia duenari sari bat emanen zaio».
Hiru sariak Baztango komertzioetan gastatzeko dirua izanen dira, eta sari bakoitza azienda batek hautatuko du:
- 1. saria behiak aukeratuko du eta 1.000 euro izanen dira.
- 2. saria zaldiak aukeratuko du eta 300 euro izanen dira.
- 3. saria ardiak aukeratuko du eta 200 euro izanen dira.
Zenbaki saritua 15 egunez ateratzen ez bada, zenbaki horren gainean dagoenari emanen diote saria.