Adierazi zutenez, «Israel proiektu kolonial bat da, ekialde hurbilean elite anglosaxoien boterea bermatzea helburu duena. Horren adierazle da, Palestinako lurrez gain, Libano eta Siriako lurrak ere okupatu izana, baita Estatu Batuen eta Europar Batasunaren erabateko laguntza militar, politiko, ekonomiko eta kulturala».
Hori dela eta, «salatu nahi dugu Israelgo estatuak hamarkadetan aitzinera daraman genozidioa, baita horri Estatu Batuek eta Europar Batasunak, Espainiar eta Frantziar Estatuak eta Eusko Jaurlaritzak eta Nafarroako Gobernuak emandako laguntza. Gehienetan esplizitua, batzuetan ezkutukoa».
Horrek «Israelen erabateko inpunitatea ekarri du, bertze behin agerian gelditu dena Libano eta Gazarako adostutako su etena ez betetzean». Hortaz, «arma trukea eta harreman ekonomiko, politiko eta kultur oro eteteko» eskatu zuten. Gainera, bat egin zuten «Nazioarteko Boikot, Desinbertsio eta Zigorren kanpainarekin, zeinak Euskal Herrian, zerrenda luze baten barnean, hiru enpresa dauzkan nabarmendua: SAPA armagintza enpresa, CAF tren ekoizlea eta Carrefour supermerkatu katea».
Eliteen «basakeria latzek giza duintasunaren marra guztiak hausten ari direla» salatu zuten, «eta Errusiaren eraso baten mehatxu faltsupean, industria militarra elikatu nahi dute, betikoek aberasten segi dezaten. Oraindik esku artean dauzkaten kolonietan boterea mantentzeko eta, batez ere, Europako herri eta langileok zangoperatuak mantentzeko».
Bide horretan, «PSOEren jarrera» ere salatu zuten, «ongi dakigu PSOE zer den, eta bertze behin ere agerian gelditu da, armagintzarako dirua kongresuko inolako bozketarik gabe onartu duenean. Badakigu diru hori nondik kenduko duten; dagoeneko egoera larrian dauden zerbitzu publikoetatik».
Horregatik «diogu, NATOri ez! Gastu militarrari ez! Gora Palestina askatua eta gora Euskal Herria antiinperialista!».
