Agerraldian adierazi zutenez, auzipetuetako zazpi baztandarretatik lau Ernaiko militanteak dira, «eta ez da kasu isolatu bat. Aurrekari bat sortu nahi dute, eta herri mugimendua kriminalizatzera joko dute hemendik aitzinera. Ehunka lagunek parte hartu zuten kanpaldi batean zazpi pertsona soilik auzipetu izanak militantzia politikoan aritzeagatik eta herri mugimenduan parte hartzeagatik epaituak izanen direla argiki adierazten du».
Aroztegiko proiektuari dagokionez, argi utzi zuten «Baztan ez dagoela salgai» eta «gure lurra eta komunitatea babesteagatik jasandako errepresioa» salatu zuten. «Argi dago handik edo hemenik sos bila dabilela Palacio de Aroztegui SL enpresa, lehenik proiektuarekin, eta orain Nafarroako eta Espainiako gobernuei eskatu dizkieten 43 milioi euroko indemnizazioarekin. Bi gobernu horiek kantitate hori ordaindu ezean, auzipetuen gain eror daiteke ordaintzearen ardura. Lurra eta herri borondatea babesteagatik hau ordaintzea onartezina dela adierazi nahi dugu».