«Etxebizitzaren prezioen tentsioa murrizteko» helburuarekin, Nafarroako Gobernuak alokairuen prezioak mugatzeko prozesua abiatu du 21 udalerritan, haien artean Baztanen. Adierazi dutenez, Nafarroako biztanleriaren % 68,3 bizi da 21 udalerri horietan.
Bizitegi Merkatuko Eremu Tentsionatu izendatzeko prozesua abiatuta, memoria idatzi eta plana garatuko dute orain. Heldu den urteko urtarrilean, berriz, lehenbiziko administrazio tramiteekin hastea aurreikusi dute. Horren ondotik, prezioaren gehienezko indizea zehaztu eta sei hilabeteko epea izanen dute udalekin batera Neurri Zehatzen Plana garatzeko.
Aurkeztutako lehenbiziko txostenean, udalerri bat eremu tentsionatu deklaratzeko baldintzak azaldu dituzte. Horretarako, guttieneko 5.000 biztanleko kopurua zehaztu dute, eta azken bortz urteetako etxebizitzen salmenta eta alokairu prezioen bilakaera aztertu dute, baita Nafarroako KPI mailarena ere. Baztani dagokionez, 2018-2023 urteen artean, salmenta prezioa % 27,04 garestitu da eta alokairuen prezioa % 137,93.
