Lekarozko Herriak erran duenez, «Elizondoko saihesbidearen proiektuak oinezkoendako igarobidea aurreikusten zuen Lekarozko biribilgunean, izan ere, herriko hilerria, bertzeak bertze, errepide berriaren bertze aldean gelditzen zen. Oinezkoendako igarobidea egin bitartean, zebrabidea margotu zuten, nolabaiteko irtenbidea ematearren. Duela hiru urte pasa, baina, Nafarroako Gobernuak zebrabidea ezabatu zuen eta orduko kontseilariak erran zuen irtenbide bat paratuko zutela epe motzean».
Hiru urte baino gehiago pasatuta, «biribilgunean ez dago oinezkoendako igarobiderik, herriak eta Baztango Udalak urtero eskatu badute ere, eta ohikoa da ikustea jendea errepidea nonahitik gurutzatzen, arrisku handiko egoerak sortuz».
Hori dela eta, «aski dela errateko unea ailegatu dela uste dugu, herritarrek behin eta berriz herriko batzarretan eskatu bezala. Elkarretaratze bat antolatu dugu urriaren 16an, 18:00etan, Lekarozko biribilgunean».